تاند: ( شنبه، د سرطان لسمه) د ننګرهار د عامې روغتیا ریاست مسوولین وایي، چې د لوی اختر په دریو ورځو کې په بېلابېلو سيمو کې د ترافیکي پېښو له امله بېلابېلو روغتونونو ته ١٦٨ ټپیان او دوه جسدونه لېږدول شوي دي.
د دغه ریاست مسوولینو ویلي، چې دغه کسان د ننګرهار سیمه ییز تخصصي، بي بي فاطمة الزهرا ولایتي او د ولسوالیو یو شمېر روغتونونو ته لېږدول شوي، چې له ډلې یې ۲ تنو خپل ژوند له لاسه ورکړی او ټپیان تر درملنې وروسته خپلو کورونو ته رخصت شوي دي.
د یادونې وړ ده، چې له دې وړاندې د غزني د عامې روغتیا ریاست مسوولینو هم د اختر په شپو ورځو کې په دغه ولایت کې د ۶۵ ترافیکي پېښو له کبله د ٢ کسانو د مړینې او ۱۲۶ نورو د ټپي کېدو خبر ورکړی و.
مخکې له جګړې وروسته، ترافیکي پېښې په افغانستان کې د مرګ ژوبلې دویم اصلي دلیل بلل کیده، خو اوس د جګړې له دریدو سره دا پېښې د مرګ ژوبلې لومړنی لوی عامل یادیږي.