تاند (جمعه، د جوزا ۲۶ مه) د افغانستان بانک ريیس په کابل کې د چین له سفیر سره د بانکي اړیکو او سوداګرۍ په اړه خبرې کړي دي.
رویټرز خبري اژانس وايي، دا خبره د افغانستان بانک ویندوی نن (جمعه) ورته وکړه او ویې ویل چې دوی دا اوونۍ سره کتلي دي.
د افغانستان بانکي سیستم د امریکا د بندیزونو له کبله له سختې ننګونې سره مخامخ دی او له بلې خوا یې اسعاري زېرمه د امریکا له لوري کنګل شوې ده.
چین له دې سره سره چې د طالبانو حکومت په رسمیت نه دی پېژندلی، په کابل کې سفارت لري او د طالبانو له حکومت سره په بیلابیلو سوداګري او سیاسي برخو کې خبرو ته دوام ورکوي.
چین په افغانستان کې اقتصادي ګټې ویني او لېواله دی چې د افغانستان په کانونو کې پانګونه وکړي.
د افغانستان بانک ویندوی حسیب الله نوري رویټرز خبري اژانس ته وویل:«د افغانستان بانک د ريیس او د چین د سفیر په کتنه کې پر بانکي اړیکو، سوداګرۍ او ځینو نورو اړوندو مسلو خبرې وشوې.»
ده همداراز وویل چې د افغانستان بانک ريیس ملاهدایت الله بدري او د چین سفیر (وانګ یو) دا کتنه د پنجشنبې په ورځ په کابل کې وکړه.
رویټرز خبري اژانس وايي چې د چین د بهرنیو چارو وزارت د دې کتنې په اړه د دوی پوښتنې ته ځواب ونه وایه.