تاند:( شنبه ، د جوزا ۱۳ مه ) د پاکستان د کورنیو چارو وزیر رانا ثناء الله ویلي، د طالبانو واکمنې ادارې اسلام اباد ته وړاندیز کړی چې له پولې لرې سیمو ته د تحریک طالبان پاکستان (TTP) وسله وال انتقال کړي.
ثناءالله وویل، افغان طالبانو وړاندیز کړی چې د تحریک طالبان پاکستان وسله وال دې د افغانستان په قبایلي سیمو کې د پاکستان او افغانستان ترمنځ د ډیورنډ کرښې په اوږدو کې ځای پر ځای شي تر څو هغو سیمو ته، چې اوس یې پاکستان پوله بولي، د هغوی لاسرسی اسانه نه وي. .
د هغه په وينا، کابل دغه وړانديز دوه مياشتې وړاندې اسلام اباد ته کړى و.
د طالبانو رژیم تر اوسه په دې اړه څه نه دي ویلي.
د پاکستان د کورنیو چارو وزیر زیاته کړه، چې د تحریک طالبان پاکستان غړي د دغه هیواد په سرحدي سیمو کښې اوسیږي او د پاکستان او افغانستان له پولو څخه د هغوي واټن پاکستان ته د هغوي لاسرسی محدودوي.
خو اسلام اباد په دې اړه نور جزیات نه دي ورکړي چې د TTP غړي به د افغانستان کومو سیمو ته انتقالیږي.
کابل کې د طالبانو رژیم ټینګار کوي چې د TTP مسله د پاکستان داخلي مسله ده او باید د دې ډلې او اسلام اباد ترمنځ په دوه اړخیزه توګه حل شي.
د طالبانو د بهرنیو چارو وزیر ملا امیرخان متقي تېره میاشت پاکستان ته د خپل سفر په ترڅ کې د اسلام اباد او تحریک طالبان پاکستان ترمنځ د سولې د خبرو د بیا پیل غوښتنه وکړه.
دا په داسې حال کې ده چې پاکستان ادعا کوي چې د تحریک طالبان پاکستان مشران په افغانستان کې دي او له هغه ځایه په پاکستان کې خپل عملیات پلانوي. هغه ادعا چې تل د کابل لخوا رد شوې ده.
میا ګله! دا دې بله!