تاند:( شنبه ، د جوزا ۱۳ مه ) د افغانستان د ریل پټلۍ ادارې لپاره د طالبانو د رژيم رئیس “بخت الرحمن شرافت” ترکیې ته د خپل سفر په ترڅ کې د “کاردمیر” د اوسپنې د توغولو له شرکت څخه لیدنه وکړه.
دغه ریاست پر خپل ټویټر لیکلي، چې شرافت د کاردیمیر د اوسپنې د استخراج شرکت مشر “سرکان اتمر” افغان پلاوي ته وړاندیز کړی چې د افغانستان د کانونو د استخراج پر ځای د ریل پټلۍ تولید کړي.
هغه دا هم وويل، چې دې پروسې په نورو هېوادونو کې هم مثبتې پايلې لرلې دي.
شرافت وايي، په کابل کې د دې طرحې په اړه بحثونه شوي او که هوکړه وشي، پلان به یې عملي شي.
د یو بل خبر له مخې: د افغانستان په چارو کې د ازبکستان د ولسمشر ځانګړي استازي عصمت الله ارګاشیف او په تاشکند کې د پاکستان سفیر احمد فاروق د افغانستان له لارې د ترانسپورتي پروژو او د ترمذه – مزار شریف – کابل – پېښور رېل پټلۍ د غځولو په اړه خبرې وکړې.
د ازبکستان د بهرنیو چارو وزارت ویلي چې په دې کتنه کې د پاکستان سفیر په سیمه ییزو پروژو کې د تاشکند ګډون مهم وباله.
د ازبکستان – افغانستان – پاکستان د اورګاډي کرښې د جوړولو لپاره د سړک نقشه د ۲۰۱۹ کال په فبرورۍ کې د درې واړو هېوادونو د چارواکو ترمنځ په تاشکند کې لاسلیک شوه.