تاند:(شنبه، د جوزا ۱۳ مه) د هند د بهرنیو چارو د وزارت ویاند “ارندام باغچي” وایي، زموږ له نظره په نوي ډیلي کې د افغانستان د سفارت د ادارې په اړه ستونزې یوه داخلي موضوع ده.
هغه زیاته کړه: هیله لرو چې افغان چارواکي به په خپل منځ کې د سفارت د کنټرول مسئله حل کړي.
په تېر حکومت کې د افغانستان سفیر فرید ماموندزي د ۲۰۲۱ کال په اګست میاشت کې د طالبانو د حکومت له واک ته رسېدو وروسته د افغانستان د استازي په توګه کار ته دوام ورکړ، خو په دې وروستیو کې د کابل نوي حکومت خپل سفیر معرفي کړ چې د دیپلوماتانو او پخوانیو له مخالفت سره مخامخ شو.
د روان کال د مې په وروستیو کې ځینو رسنیو د افغانستان د بهرنیو چارو د وزارت د یوه پخواني ډیپلوماټ له خولې خبر ورکړ چې د هند حکومت په نوي ډیلي کې د افغانستان سفارت طالبانو ته سپارلی دی.
دغې سرچینې دا هم ویلي چې “قادرشاه” د طالبانو له خوا په نوي ډیلي کې د افغانستان د سفارت د مشر په توګه ټاکل شوی دی.
قادر شاه په هند کې د افغانستان د سفارت د نوي سرپرست په توګه تر ټاکل کېدو مخکې د دغه هېواد په تېر حکومت کې د ملي امنیت د شورا د ویاند په توګه کار کاوه.