تاند:( پنجشبه ، د جوزا ۱۱ مه ) د طالبانو د رژيم امربالمعروف وزارت د کابل ښار لپاره ۲۰۰ نوي مذهبي پولیس، چې دوی یې محتسبین بولي، ګوماري.
یاد شوي وزارت پرون د دغو کسانو د ګومارنې لپاره له نوماندانو ملایانو ازموینه اخیستې ده.
د وزارت په یوه اعلامیه کې د ازموینې د روڼتیا ټینګار شوی او ویل شوي: ((د محتسبینو د ګمارنې ازموینې د پوښتنو د برابرولو پروسې لپاره منتخب شپږ تنه شیوخ کرام قرنطین شوي و، او هر ډول ارتباط نیونې مخه یي نیول شوي وه؛ څو د ازموینې پروسه شفافه ترسره شي.))
طالبانو د یادو محتسبینو د امتیازاتو او په ټوله کې د امربالمعروف وزارت د بودیجې په اړه څه نه دي ویلي.
یاد شوی وزارت د طالبانو له بیا واکمنیدو سره، د ښځو چارو وزارت پر ځای رامنځته او د ښځو وزارت ټول مرکزي او ولایتي تاسیسات او امکانات په واک کې ورکړل شول.
د طالبانو ځینو منتقدینو ویلي، چې طالب شېخان خپلو کې یو پر بل دومره بې باوره دي، چې د دوه سوو کسانو د ګومارنې د ازموینې اخیستونکي قرنطینوي.
طالبانو دغه راز د خپلو مذهبي پولیسو کاري حدود نه دي ښودلي.
دوی پرون په کابل ښار کې د همدغو مذهبي پولیسو لخوا د نیشه یي توکیو د پلور په تور د دوو تنو د نیونې خبر ورکړی.