تاند:( چار شنبه ، د جوزا ۳ مه ) د طالبانو بهرنیو چاروزارت نن کابل ته په بلغاریا کې د مړو شویو ۱۸ افغان پناه غوښتونکو د جسدونو د لېږد خبر ورکړ.
د وزارت مرستیال ویاند حافظ ضیا احمد ویلي، چې اروپا ته پر قاچاقي لارو د تلونکو دغو افغان پناه غوښتونکو جسدونه د اداري او بانکي اسنادو د ځنډني پروسس له امله له مړینې شاوخوا درې میاشتې وروسته کابل ته ولېږدول شول.
د طالبانو له بیا واکمنیدو وروسته، بهرنیو هېوادونو ته په قانوني او غیر قانوني او قاچاقي لارو د سلګونه زره افغانانو د وتو لړۍ چټکه شوې.
طالب چارواکي له وړاندې هېواد نه وتي خلک هم هېواد ته وربولي او د بشپړ امنیت او آرامه ژوند ډاډ ورکوي، خو خلک وایي چې دوی په هېواد کې شته خلک هم له سخت استبداد سره مخ کړي او د ژوند شرایطو له خرابولو سره یې هېواد پریښودو ته اړ ویستي.