تاند (یکشنبه، د ثور ۳۱ مه) د طالبانو حکومت د دفاع وزارت وايي، نن سهار یې یوه MD- 530څرخکه په سمنګان ولایت د ټکر له کبله ولوېده.
دفاع وزارت په یوه خبرپاڼه کې ویلي چې په دې پېښه کې دوه پیلوټان وژل شوي دي.
د خبرپاڼې له مخې، دا څرخکه نن سهار ۹ بجې د ګزمې لپاره د مزار شریف له هوايي ډګره سمنګان ولایت ته روانه شوه چې وروسته یې د سمنګان ولایت د خلم ولسوالۍ په سیغانچي سیمه کې د برښنا له یوې پایې سره ټکر وکړ او وغورځېده.
د طالبانو دفاع وزارت دا معلومات نهدي ورکړي چې په لوېدلې څرخکه کې وژل شوي پیلوټان د جمهوري نظام د مهال پېلوټان وو او په وروستیو کې د دوی له لوري روزل شوي پېلوټان.
د جمهوري نظام د مهال یو شمېر پېلوټان په هیواد کې پاتې شول او یو شمېر له بهره بېرته افغانستان ته راغلل چې اوس د طالبانو د حکومت له دفاع وزارت سره کار کوي.