تاند (یکشنبه، د ثور ۳۱مه) ایران وايي یو جګپوړی پوځي چارواکی یې له طالب چارواکو سره د خبرو لپاره په داسې حال کې کابل ته تللی چې د دوو هیوادونو ترمنځ د هلمند سین د اوبو د حق پر سر ترینګلتیا زیاته شوې ده.
ایراني رسنۍ د طالبانو د حکومت د دفاع وزارت په قول وايي چې د ایران د وسله والو ځواکونو د لویې درستیزوالۍ د پلان او عملیاتو د څانګې د ريیس بهرام حسیني مقدم په مشرۍ ایراني پلاوي په کابل کې د طالبانو د حکومت د لوی درستیز له مرستیال حاجي مالي خان صدیقي سره وکتل.
د راپور پر اساس، د خبرو په ترڅ کې افغان لوري وویل چې له ایران سره د ښو اړیکو د لرلو هڅه کوي او په بیلابیلو برخو کې له دغه ګاونډي سره ښو اړیکو ته ژمن دي.
ایراني پلاوي هم له افغانستان سره د ښو اړیو د لرلو په اړه د ایران پر ارادې ټینګار وکړ.
د ایران او افغانستان ترمنځ په وروستیو ورځو کې د هلمند سین د اوبو پر سر ناندرۍ زیاتې شوي دي. دا ناندرۍ په ځانګړي ډول وروسته له دې ډیرې شوې چې د ایران ولسمشر ابراهیم ريیسي د چهارشنبې په ورځ د سیستان او بلوچستان ولایت د سفر په ترڅ کې د طالبانو حکومت ته خبرداری ورکړ.
ایران د طالبانو له حکومته غوښتي چې د دوی پلاوي ته اجازه ورکړي چې د کجکي بند د اوبو اندازه وویني.