تاند:( یکشنبه ، د غویي ۳۱ مه ) د فرانسې د کورنیو چارو وزیر جیرالډ درمین امریکا ته د خپل وروستي سفر په ترڅ کې په اروپا کې د تروریستي ګواښونو د بیا راپورته کیدو په اړه خبرداری ورکړی دی.
نوموړي له اې ایف پي سره خبرو کې له افغانستانه د امریکایي ځواکونو د وتو پر څرنګوالي هم نیوکې کړي دي.
امریکايي او ناټو ځواکونه د ۲۰۲۱ کال په اګست میاشت کې له افغانستانه په ناڅاپي ډول ووتل، چې ورسره د افغانستان نظام سقوط او طالبان واکمن شول.
د فرانسې د کورنیو چارو وزیر د طالبانو له بیا واکمنیدو وروسته، په افغانستان کې د داعش ترهګرې ډلې د بیا پياوړتیا په اړه هم اندیښنه ښودلې او ویلي، چې یاده ډله اروپايي هېوادونه هم ګواښي.
طالبانو د فرانسوي چارواکي تازه خبرو ته غبرګون نه دی ښودلی، خو مخکې یې ورته اندیښنې رد کړي دي.