تاند (پنجشنبه، د ثور ۲۷مه) د امریکا د بهرنیو چارو وزارت پرون (چهارشنبې) اعلان وکړ چې د کانګریس غړي به پرېږدي چې هغه اسناد وګوري چې د بهرنیو چارو وزارت ۲۳ کارکوونکو او دیپلوماتانو په ۲۰۲۱ کې لاسلیک کړي او له افغانستانه د امریکايي پوځیانو د وتلو په صورت کې د طالبانو د چټک پرمختګ د احتمال په وړاندې خبرداری ورکوي.
د امریکا د باندنیو چارو وزارت دا اعلان څو ورځې وروسته له دې وکړ چې د کانګریس د استازو جرګې د بهرنیو چارو کمېټې پرېکړه وکړه چې د اسنادو د نه سپارلو په صورت کې به د باندنیو چارو وزیر انتوني بلینکن استیضاح او سلب اعتماد کړي.
همداراز روانه اوونۍ د امریکا د کانګریس یوه مخکښ غړي د تحقیقاتو لپاره له افغانستانه د امریکايي پوځیانو د نامنظمه وتلو په اړه د ټولو مرکو د متن غوښتنه وکړه.
د متحدو ایالتونو د استازو جرګې د بهرنیو اړیکو کمېټې ريیس مایکل مک کال د روانې اوونۍ د یکشنبې په ورځ په رسمي ډول د امریکا د بهرنیو چارو وزارت د پنځو هغو پخوانیو او اوسنیو چارواکو د مرکو غوښتنه کړې چې له افغانستانه د بې بندوبسته وتلو په پروسه کې ښکېل وو.
ښاغلي مک کال په خپل بیان کې ویلي، دوی د روانو څېړنو په ترڅ کې دې نتیجې ته رسیدلي چې پنځه تنه مهم معلومات لري چې له افغانستانه د بایډن د حکومت له ناورینه ډک وتل څرنګه او ولې د ۱۳ امریکايي پوځیانو د وژل کېدو، د ۴۷ نورو د ټپي کېدو، او په هغه هیواد کې چې د تروریستانو له لوري کنټرولېږي، د څه باندې زرو امریکايي اتباعو او زرګونو افغان شریکانو د پاتې کېدو سبب شو.
ده ټینګار کړی چې د امریکا د بهرنیو چارو وزارت دا ۵ پخواني او اوسني چارواکي باید بې ځنډه د استازو جرګې د بهرنیو اړیکو له کمېټې سره خبرې وکړي.
د امریکا د کانګریس جمهوریپال غړي په ځانګړي ډول له افغانستانه د امریکايي پوځیانو د بې بندوبسته وتلو په اړه د څېړنو غوښتونکي دي چې له کبله یې ۱۳ امریکايي پوځیان د کابل په نړیوال هوايي ډګر کې ووژل شول.