تاند:( سې شنبه ، د غویي ۱۹ ) د پاکستان د عوامي نېشنل ګوند د پښتونخوا مشر “ایمل ولي خان” پر خپل فیسبوک لیکلي، چې د طالبانو د بهرنیو چارو وزیر ” مولوي امیر خان متقي” سره یې په لیدنه کې دې ټینګار کړی، چې په افغانستان کې باید ټاکنې ترسره او نجونو ته د زده کړو اجازه ورکړل شي.
هغه زیاته کړه، په دې کتنه کې یې له متقي وغوښتل چې په افغانستان کې د ولسواکۍ او سیاسي نظام د تطبیق او بشپړولو لپاره د دغه هېواد د اتباعو ته د خپلو استازو د ټاکلو په برخه کې کار وکړي.
نوموړی زیاتوي، چې په دې غونډه کې یې د نجونو د زده کړو پر حق هم ټینګار کړی.
ایمل ولي دا ادعا هم کړې، چې په افغان خاوره کې فعال پاکستاني طالبان او نورې ډلې د پښتونخوا او بلوچستان له خلکو باج غواړي.
طالبانو د نوموړي د ادعا شویو څرګندونو په اړه څه نه دي ویلي.
ایمل ولي او بل پښتون سیاستوال محمود خان اڅکزی د پاکستاني ملایانو په ملتیا پاکستان ته د طالب وزیر ملا متقي د سفر پر مهال له نوموړي سره د لیدنې له امله د طالبانو د مخالفانو سختو نیوکو سره مخ دي.