تاند:( جمعه ، د غویي ۱۵ )  ټاکل شوې، چې د پاکستان پلازمېنه اسلام اباد نن د طالبانو او چین د بهرنیو چارو د وزیرانو کوربه وي.

د طالبانو بهرنیو چارو وزارت تایید کړې، چې وزیر یې ملا امیرخان متقي نن پاکستان ته په سفر ځي.

له متقي سره د طالبانو یو پلاوی هم ملګری دی، چې په اړه یې لا جزیات نه دي ورکړل شوي.

د طالبانو رژيم د متقي د سفر اصلي هدف له پاکستاني او چینایي لوري سره پر سیاسي او اقتصادي مسایلو خبرې اترې ښودلي.

شنونکي باور لري، چې په پاکستان کې د طالبانو، چین او پاکستان د تازه خبرو د بحث اصلي موضوع به د افغانستان په اړه د دوحې غونډې په تړاو وي.

یاده غونډه، چې ملګرو ملتونو یې کوربه توب کاوه، د بندو دروازو تر شا پکې نړیوالې ټولنې له طالبانو سره د احتمالي تعاملاتو اصول  روښانه کړي دي.

تمه کیږي، چې یاد شوي اصول به د چین او پاکستان د بهرنیو چارو د وزیرانو له لوري طالب وزیر سره شریک کړل شي.

طالبانو وار د مخه د دوحې غونډې پر مهال، د افغانستان په اړه ښودل شوې اندیښنې او نیوکې بې بنسټه ګڼلي دي.