سه شنبه, مارچ 5, 2024
Home+د عبیدالله درویش دُراني اویایمه کلیزه دې بختوره وي

د عبیدالله درویش دُراني اویایمه کلیزه دې بختوره وي

پوهندوی آصف بهاند

دا چـې ځـړېــږي مـخـامـخ درتـه پـه دار سـرونه

پـه دې وطـن کې بـه هـمـدغـه وو د کـار سرونه

وږي یې هسې هم غاصب همېشه وړي په زوره

کشکې دا ځـل زموږ غـنم وکـړي د مـار سـرونه

(درویش دُراني)

نن د پښتو ادب د مطرح شاعر او لیکوال عبیدالله درویش دُراني اویایمه کلیزه ده. همدا ورځ د ده د هنر، شعر او ترسره کړو فرهنگي خدمتونو ته د درناوي لپاره ځانګړې شوې ده.

دا ورځ دې بختوره وي. د اوسني ځوان نسل په منځ کې د درویش صاحب شعر او فکر ځانگړي دریځ او خپل تاثیر لري.

ښاغلي درویش دراني ته ښه روغتیا، اوږد عمر او د فرهنگي کارونو د ترسره کولو لپاره نوره حوصله او بریا غواړم. له هغه چا نه هم مننه کوم چې د درویش دراني د اویایمې کلیزې ورځ یې د دوریش دراني د ورځې په نامه یاده کړه، څو ټول قلموال وکولای شي چې د دې حقداره فرهنگي شخصیت د ترسره کړو کارونو او خدمتونو یادونه او درناوی وکړي. دا دود باید نور هم پیاوړی او عام شي چې موږ د خپلو علمي ــ فرهنگي شخصیتونو درناوی په ژوندینې وکړو.

له ښاغلي عبیدالله درویش دراني څځه مننه او خوښنه چې د خلکو په پوهولو او راویښولو کې یې ډېر زحمت گاللی دی، دا نسل او راتلونکي نسلونه به یې دا خدمت هېر نه کړي.

دلته به د ښاغلي درویش دراني د بختورې کلیزې د درناوي په پار د ښاغلي نقیب‌الله لارمل یوه لنډه لیکنه راواخلم چې په فیسبوک کې یې د دراني صاحب د کلیزې په پار خپره کړې ده:

«عبيد الله چې پۀ ادبي کړيو کې د دروېش دوراني پۀ نامه ياديږي، د سويلي پښتونخوا پۀ کوټه ښار کې د ۱۹۵۳ م کال پۀ شاوخوا کې وزېږېد. لومړنۍ او لوړې زده کړې يې پۀ خپله سيمه کې کړې او د کوټې لۀ بلوچستان اکاډمۍ نه يې پۀ انګليسي ادبياتو کې ايم اې کړې ده. دی اوس د همدې پوهنتون د ادبياتو استاذ هم دی.

دروېش دورانی د پښتو د تېرو دوه نيمو لسيزو نماينده شاعر دی، چې د لر و برو پښتنو د چاپيريال او فکر پلوشې يې پۀ شعر کې د اوچتو خيالونو او ژور عاطفي تړون پۀ بڼه څرګندې دي.

دروېش تر نورو شاعرانو د پښتو پۀ ساډوبي حال ډېر غمجن دی:

دا چې ځړېـږي مخامخ درته پۀ دار سرونه

پۀ دې وطن کې به همدغه وو د کار سرونه

وږي یې هسې هم غاصب همېشه وړي پۀ زوره

کشکې دا ځل زموږ غنم وکړي د مار سرونه

نن د مې ۴مه د دې عظیم او ستر شاعر ښاغلي دروېش دراني د زوکړې ۷۰ مه کلیزه ده. دغه ورځ د دروېش صیب ژوند، هنر، شعر او خدمت ته ځانګړې شوې ده.

د پښتنو دغه عظيم شخصیت ته دې رب ج اوږد، خوشحاله او د خير عمر ورکړي!

چا به هسې ويل يار لره دې بيايم

زۀ دروېش به پۀ رښتيا پسې روان شوم

ــــــ

‏تۀ طرفدار د تاريکۍ زۀ ارمانجن د رڼا

‏ملګريه! درومه ستا جلا زما جلا لاره ده

ـــــ

‏‏با وجود د دې چې تاته لاره نۀ وه

ما لۀ بل چا سره لاره جوړه نۀ کړه

ــــ

زړۀ مې درد کؤي لۀ زړۀ ورپسې ژاړم

دښمنان چې مې وي ، مـړۀ ورپسې ژاړم

ـــــــ

بېلتانۀ دې د هر چا پۀ غم شریک کړم

یار د بل درومي او زۀ ورپسې ژاړم

ـــــ

ليک د يار راغلی دی دروېش ته دی يې نۀ لولي

وجه يې دا ښيي چې ليکلی پۀ پښتو نۀ دی

ـــــ

بیا پۀ جنګ ښکاري هوا او څراغونه

خدایه و ساتې رڼا او څراغونه

یه مرګېه، ماشومان مې راته خاندي

سره پرېږده څو شپې ما او څراغونه

خپل مخونه ستا د مخ پۀ رڼا مینځي

لمر، سپوږمۍ، ستوري، برېښنا او څراغونه

پۀ دې نور پسې سپېڅلو خلکو مه ځئ

یو ځای شوي دي بلا او څراغونه

د وطن پۀ هدیرو کې وي دروېشه

هره شپه نرۍ ژړا او څراغونه

LEAVE A REPLY

Please enter your comment!
Please enter your name here

- Advertisment -

ادب