تاند (جمعه، د لیندۍ/ قوث ۲ مه) د افغانستان لپاره د چین د بهرنیو چارو وزارت ځانګړي استازي یو کشیاو بونګ پرون (پنجشبې) په عشق اباد کې د ترکمنستان د باندنیو چارو وزارت له مرستیال سردار محمد دوردي یف سره ولیدل.
د ترکمنستان د باندنیو چارو وزارت په یوه خبرپاڼه کې ویلي چې په دې کتنه کې دواړو خواوو په خپل منځ کې د دوه اړخیزو ګټو پر اساس د اوږدمهالو ستراتیژیکو همکاریو د رامنځته کولو لپاره پر لومړیتوبونو خبرې وکړې.
دوی پر هغو موافقو هم خبرې وکړې چې دواړو هیوادونو پرې پخوا سلا کړې ده.
دواړو خواوو د افغانستان د ګاونډیو هېوادونو د بهرنیو چارو وزیرانو د پنځمې ناستې لپاره، چې په ترکمنستان کې ترسره کېږي، د چمتووالي په اړه نظرونه تبادله کړل.
دواړو اړخونو تایید کړه چې ترکمنستان او چین به د افغانستان د اقتصادي بیا رغونې لپاره هر اړخیز ملاتړ ته دوام ورکړي.