تاند (جمعه، د لیندۍ/ قوس ۲ مه) په افغانستان کې د کورنیو چارو وزارت وايي، د بغلان ولایت په نهرین ولسوالۍ کې لږ تر لږه لس کسان هغه وخت ووژل شول چې یوه وسلهوال په یوه زیارت کې پر راټولو شویو خلکو ډزې وکړې.
د وزارت پر اساس، په زیارت کې خلک د اوونیزو مراسمو لپاره راټول شوي وو چې ډزې پرې وشوې.
د پېښې جزئیات لا هم روښانه نه دي، خو وزارت ویلي چې د برید د څرنګوالي او د عاملانو د پېژندلو لپاره تحقیقات روان دي.
د طالبانو د کورنیو چارو وزارت ویاند عبدالمتین قانع فرانس پریس خبري اژانس ته ویلي:
“یوه سړي د نهرین ولسوالۍ په یوه زیارت کې په صوفیانو ډزې وکړې، چې په نتیجه کې یې لس کسان وژل شوي دي.”
دا برید تیره شپه د نهرین په زاړه ښار کې د سید پاچاآغا، چې په سید پاچاجان زیارت هم مشهور دی، هغه مهال وشو چې د صوفي طریقې زیارت کوونکي د جمعې شپې لپاره پکې راټول شوي وو او عبادت یې کاوه.
ویل کېږي چې هغوی هره جمعه په دې زیارت کې راټولیږي او د خدای ذکر کوي.
تراوسه کومې ډلې د دې برید مسوولیت په غاړه نه دی اخیستی. خو ګومان کېږي چې دا کار د داعش وي ځکه چې داعش له زیارتونو او صوفیانو سر ه عقیدوي اختلاف لري.