تاند:( پنجشنبه ، د غویي لومړۍ ) د طالب رژیم د په رسمیت پېژندلو په اړه د ملګرو ملتونو د سرمنشي د مرستیالې آمنه محمد څرګندونو ته له پراخو غبرګونونو وروسته، د دغه سازمان د سرمنشي ویاند ویلي چې دوی د طالبانو د رسمیت پيدا کولو لابي نه کوي.
هغه وویل چې د طالبانو د په رسمیت پېژندلو په اړه یوازې د ملګرو ملتونو غړي هیوادونه پریکړه کولای شي.
د ملګرو ملتونو د عمومي منشي مرستیالې امینه محمد د دوشنبې په ورځ په پرنسټن پوهنتون کې وویل چې د افغانستان لپاره د ملګرو ملتونو د عمومي منشي په غونډه کې به د طالبانو د رژیم د په رسمیت پېژندلو پر لارو چارو خبرې وشي.
هغې وویل، د نړۍ هېوادونه باید د افغانستان د وضعیت د لا خرابېدو د مخنیوي لپاره د طالبانو د رسمي پېژندنې په اړه خبرې وکړي.
د مېرمن محمد دغو څرګندونو ته یو شمېر طالب ضدو څېرو پراخ غبرګونونه ښودلي او ویلي، چې ملګري ملتونه د طالبانو د ملاتړ او لابۍ لپاره کار کوي.
د ملګرو ملتونو د سرمنشي ویاند په خپل خبري کنفرانس کې هڅه وکړه چې د امینه محمد دغه څرګندونې ورغوي.
دوجاریک وویل چې ملګري ملتونه دا واک نه لري چې طالبان په رسمیت وپیژني.
هغه آمنه محمد د ښځو د حقونو یوه مدافعه وبلله.
نوموړي ومنله، چې دوی به د غویي په یوولسمه په دوحه کې د افغانستان لپاره د مختلفو هېوادونو له ځانګړو استازو سره د طالبانو د په رسمیت پېژندلو په اړه مشورتي غونډه ولري.
نوموړي ونه ویل، چې طالبان به دغه غونډه کې ګډون ولري کنه؟
په قطر کې د طالبانو د سیاسي دفتر مشر سهیل شاهین، چې طالبانو په ملګرو ملتونو کې د دوی د احتمالي استازي په توګه نوماند کړی، ویلي: دوی سره په دې اړه رسمي خبرې نه دي شوي.
شاهین په ورته مهال، هیله مندي ښودلې چې رژیم به یې په رسمیت وپېژندل شي.
ملګري ملتونه نسته هلته ټول غلامان د امریکا په ډالرو پړسیدلي ناست دي. همدغه خبیث ملګري ملتونه وه سي افغانستان ته د یرغلګرو راتګ رسمي کړ ، دغه ملګري ملتونه وه سي د امریکا په غوښتنه یې اشرار راوستل او همدغه ملګري غلامان وه سي د امریکې په غوښتنه یې د طالبانو هرکلئ وکړ 😡