تاند:( چار شنبه، د حمل ۱۶ ) د طالبانو د بهرنیو چارو وزارت په یوه اعلامیه کې ویلي، چې په الاقصی جومات کي پر بې دفاع لمونځ کوونکو د اسرائیلي ځواکونو برید په کلکو ټکو غندي.
سرچینه زیاتوي، د تیري شپې د اسرائیلي ځواکونو په دې برید کې شاوخوا ۱۰۰ بیگناه فلسطینیان ټپیان شوي او ۴۰۰ نور د دوی له لوري نیول شوي دي.
د طالبانو په اعلامیه کې راغلي:(( د اسرائیلي ځواکونو له لوري په مظلومو فلسطینیانو دغه ډول بشر ضد کړنې او د سپیڅلو اماکنو بې حرمتي له نړیوالو، اسلامي او انساني قوانینو څخه ښکاره سرغړونه او د نړۍ د مسلمانانو احساسات راپارول، ارزښتونو او مقدساتو ته سپکاوی دی.))
د طالبانو ځینو منتقدینو بیا ویلي، چې که طالبان ریښتیا د اسلامي حقونو دعوه دار وي، په خپل هېواد کې دې د ټولو اسلامي اصولو خلاف د نجونو او ښځو پر مخ د زده کړو او کار دروازې خلاصې او اقتصادي څرخ په تحرک راولي، چې اوج ته رسیدلی بشري او اقتصادي ناورین لږ کنټرول کړي.
البته پر مظلومو فلسطینیانو باندی د اسراېلیانو مظالم د کلکی غندنی او کرکی وړ دی.
طالبان دې لومړی پر افغانانو ظلمونه ودروي بیا دې د اسرائیلو ظلمونه وغندي.
په سپین سترګۍ سره د تش په نوم عمومي عفوې یادول او بیا د دولتي کارمندانو شکنجه کول او وژل، د خلکو آواز خپه کول، د ښځینه وو د زده کړو او کار باندې بندیزونه لګول، د ملي بیرغ، ملي سرود او ملي نښانونو سره دښمني کول، د قدرت وحشیانه انحصار او په سلګونو نور جنایات د اسرائیلو د ظلمونو څخه کم نه دي.