تاند:( چار شنبه، د حمل ۱۶ ) د طالبانو د بهرنیو چارو وزیر مولوي امیرخان متقي نن د افغانستان لپاره د روسیې سفیر دیمیتري ژیرنوف سره لیدلي.
د هغه مطبوعاتي دفتر ویلي، چې متقي له روسي سفیر څخه په دې لیدنه کې د سیاسي او اقتصادي اړیکو د پراخولو غوښتنه کړې.
ویل شوي، چې د روسیې سفیر کابل ته د خپل هېواد د دولتي پلاویو د راتلو لپاره د همکارۍ چمتووالی ښودلی.
طالب وزیر په دې لیدنه کې ډاډ ورکړی، چې افغانستان اوس امنیت لري او پکې کوم جدي ګواښ نشته.
دا په داسې حال کې ده، چې د طالبانو د واکمنۍ پر مهال د ځانمرګي برید له امله د روسیې تړل شوی سفارت لا بیا کابل کې نه دی پرانیستل شوی.
دغه هېواد تازه اعلان کړی، چې په مزار شریف کې د امنیتي ننګونو له امله خپله تړل شوې کونسلګري بیرته پرانیزي.