تاند:( چار شنبه، د حمل ۱۶ ) د ننګرهار لپاره د طالبانو د رژیم چارواکي وایي، چې د دغه ولایت د حصارک ولسوالۍ صاحبزاده ګانو کلي کې نن د پرزول شوي جمهوري نظام د یوه چارواکي په کور کې د راکټ مرمۍ چاودنه کړې ده.
د دوی په وینا، د دغې چاودنې له امله د نوموړي یوه اتلس کلنه لور وژل شوې او يوه ۱۶ کلنه لور يې ټپي شوې ده.
د طالبانو په وینا، ټپي شوې نجلۍ روغتون ته وړل شوې.
طالبانو د نجونو د پلار نوم او مخکینۍ دنده نه ده ښودلې.
په وروستیو کې د ناچاوده توکیو د چاودنو له امله د افغان مرګ ژوبلې د زیاتوالي خبرونه ورکړل شوي.