تاند (سې شنبه، د حمل ۱۵مه) مزارشریف ښار ته نژدې په نهر شاهي ولسوالۍ کې د داعش خلاف د طالبانو تصفیوي عملیات د طالبانو په وینا د داعش د ۶ غړیو په وژلو پای ته رسیدلي دي.
د شپې په شاوخوا ۹ بجې په سیمه کې نښته پیل شوه او څو ساعته یې دوام وکړ. د طالبانو د حکومت د بلخ د امنیه قوماندانۍ د ویندوی محمداصف دراني په وینا، طالبانو په نهر شاهي ولسوالۍ کې د داعش پر یوه پټنځای عملیات وکړل او د ۶ داعشیانو، چې ده خوارج وبلل، په وژلو پای ته ورسیدل.
ده ادعا وکړه چې په دې عملیاتو کې طالبانو ته مرګ ژوبله نه ده اوښتې.
په وروستیو کې په مزارشریف کې د طالبانو او داعش ترمنځ د نښتو دا څویمه پېښه ده. په ټولو پېښو کې طالبانو د داعش غړیو ته د مرګ ژوبلو د اړولو ادعا کړې ده. خو طالبان لا هم وايي چې داعش یې په افغانستان کې ختم کړی دی.
که څه هم د طالبانو تر واک ته رسیدو مخکې لا په افغانستان کې د داعش جبهې له منځه وړل شوي او هیڅ سیمه د دې ډلې په لاس کې نه شته خو بیا هم دا ډله غلچکيو او انتحاري بریدونو ته دوام ورکوي.
د تیر حوت په ۱۸ مه د بلخ ولایت لپاره د طالبانو والي محمد داوود مزمل په خپل دفتر کې ووژل شو او مسوولیت یې داعش په غاړه واخیست.