تاند:( دوشنبه، د حمل ۱۴ ) د طالبانو نا لیدل شوي مشر ملا هبت الله د طالبانو په لیکو، په ځانګړي ډول امنیتي برخه کې د کار کولو لپاره پينځه شرطونه ټاکلي دي.

په ننګرهار کې د طالبانو د امنیتي ارګانونو د تصفیې کمېسیون مشر مولوي محمد طاهر مبارز په یوه غونډه کې په دې اړه د ملا هبت الله فرمان لوستی او ویلي، چې د فرمان له مخې د دغو ځانګړنو لرونکي کسان د طالبانو په امنیتي لیکو کې پاتې کیدای شي .

هغه په مشخص ډول داسې ویلي:(( دغو صفاتو کې لومړی له فتحې وړاندې د مجاهدینو صف کې پاتې کېدونکي مجاهدین، دوهم چریکي مجاهدین، درېیم نفوذي مجاهدین، څلورم د دښمن صف ته لېږل شوي یا د دښمن له صف څخه د اشغال په وخت کې بیل شوي چې وروسته یې درې کاله په ریښتنولۍ جهاد کړی وي، او همدارنګه پنځم هم د شهید مجاهد د کورنۍ نږدې خپلوان، لکه زوی، ورور یا پلار چې د ښه صورت او سیرت درلودونکی او تاییدي یې د ډلګۍ مشرانو له لوري شوې وي، کولی شي چې امنیتي صفوفو کې خپلې چارې مخته یوسي.))

ملا مبارز ټینګار وکړ، چې دا امر به ډېر ژر د ننګرهار ولایت په ټولو امنیتي ارګانونو کې تطبیق او پلی شي.

مبارز وویل چې د کورنیو چارو وزارت اړوند د امنیې قوماندانۍ په ټولو جزتامو کې تصفیه په چټکی سره روانه ده او په هرې ولسوالۍ کې پنځه کسیز ګډ کمیسون هم جوړ شوی تر څو په ولسوالیو کې یاده چاره مخته یوسي.

د هغه په وینا، د دغې تصفیې موخه د طالبانو په اډانه کې د« مغرضو او بدو خلکو» پیژندل او له دندو ګوښه کول دي.

دا په داسې حال کې ده، چې په وروستیو کې د طالبانو له امنیتي ادارو کې د جمهوري نظام د یو شمېر محدودو ګومارل شویو منسوبینو د ګوښه کیدو خبرونه ورکړل شوي.