تاند: ( شنبه ، د حمل ۱۲ مه) اروپايي ټولنه وایي، افغانستان ته یې سل ټنه طبي توکي او درمل استولي او له اړو افغانانو سره د خپلو مرستو دوام ته ژمنه ده.
د افغانستان لپاره د اروپایي ټولنې څانګې پر خپل ټوېټر لیکلي چې د هوايي دهلېز له لارې یې د ۱۰۰ ټنه طبي توکو او درملو بله کڅوړه کابل ته استولې ده.
سرچینې زیاته کړې، دغه ټولنه له اړو افغانانو سره د خپلو مرستو دوام ته ژمنه ده.
د یادونې ده، اروپايي ټولنې نږدې یوه میاشت وړاندې هم د سل ټنه طبي توکو او درملو مرسته افغانستان ته را استولې وه.
د طالبانو له بيا واکمنيدو سره په افغانستان کې د بشري او اقتصادي ناورين د شدت تر څنګ، روغتيايي خدمتونه په پراخه کچه کم شوي چې خلک ېې ډېرو ستونزو سره مخ کړي دي.