تاند:( سې شنبه، د کب ۲۳) د افغانستان بانک لپاره د طالبانو د رژیم چارواکو ویلي، چې د بشرپاله مرستو ۴۰ مېلیون ډالري کڅوړه نن کابل ته را ورسېده.
د بانک د اعلامیې له مخې، دا مرسته په کابل کې یوه خصوصي بانک ته وسپارل شوه.
طالبان او ملګري ملتونه معمولاً د دغو نقدي مرستو د مصرف د څرنګوالي په اړه جزیات نه ورکوي.
د طالبانو منتقدین ادعا کوي، چې دا مرستې د طالبانو د رژیم د بقا لپاره کیږي، خو طالبان دا تورونه ردوي او وایي چې یادې پیسې د ملګرو ملتونو د اړوندو ادارو د بشري مرستو د ترسره کولو لپاره دي.
له دې سره باور دا دی، چې افغانستان ته د ډالري کڅوړو راتګ که د هر هدف لپاره وي، د افغانیو د ثبات ساتلو لپاره یې مهم رول لوبولی.