تاند(شنبه، د حوت ۲۰ مه) په مزارشریف ښار کې د تبیان په کلتوري مرکز کې چاودنه شوې او د ځینو راپورونو له مخې لږترلږه ۳ تنه پکې وژل شوي او شاوخوا ۱۶ نور ژوبل دي.
تبیان په شیعه افغانانو پورې اړوند مرکز دی چې د طالبانو ملاتړ کوي.
د دغه مرکز مسوول سیدشبیر محمودي پېښه تایید کړه، ویې ویل چې چاودنه داسې مهال وشوه چې تبیان کلتوري مرکز په مزارشریف کې د خبریالانو د ستاینې لپاره غونډه جوړه کړې وه.
د ښاغلي محمودي په وینا، په دې غونډه کې تر ۲۵ ډیر خبریالان او د پوهنتون استادان او محصلان راټول شوي وو.
ښاغلی محمودي په چاودنه کې د دوو تنو وژل کېدا او د څه باندې ۱۰ تنو ټپي کېدا تاییدوي.
له چاودنې وروسته د پېښې ځای طالب ځواکونو کلابنده کړې ده.
دا چاودنه دوه ورځې وروسته له دې کېږي چې په یوه انتحاري د بلخ د ولایت په مقام کې د طالبانو والي داوود مزمل وواژه.