تاند: ( سې شنبه، د حوت ۲ ) د پاکستان د بهرنیو چارو وزیر بلاول بوټو زرداري له دویچه ویله سره په خبرو کې ویلي چې د پاکستان د تحریک طالبان ډلې هیڅ ملګری هېواد د پاکستان ملګری نه شي کیدای.

هغه په دې خبرو کې د افغانستان د طالبانو واکمنې ادارې ته اشاره کړې، چې پاکستان یې د پاکستاني طالبانو سره په ښو اړیکو او ورته په پناه ورکولو تورنوي.

د طالبانو ادارې د پاکستان یاد شوي تورونه تل رد کړي دي.

د پاکستان د بهرنیو چارو وزیر په تازه مرکه کې دا هم ویلي، چې د پاکستان له تحریک طالبان سره د افغانستان د واکمنې ادارې اړیکې تر یوه ځایه د دغه هېواد د مخکیني صدراعظم عمران خان د حکومت د متناقضو پالېسیو پایله ده.

زرداري وایي د عمران خان حکومت غوښتل چې د افغانستان موقت حکومت د پاکستان له تحریک طالبان سره د روغې جوړې اسانتیاوې برابرې کړي او په پاکستان کې یې د وسله والو د ځای پرځای کولو پلان درلود، خو ټولو پاکستانیانو ټینګار کاوه چې هغه ترهګر چې د پوځ په ډله ییزه وژنه کې لاس لري. هیڅکله ورسره خبرې نه شي کیدای.

زرداري ویلي، د پاکستان نوي حکومت او پوځي مشرتابه له ترهګرو سره د خوشالولو پالیسي پای ته رسولې ده او یو ځل بیا یې ټینګار کړی، چې د افغانستان واکمنه اداره له پاکستان سره د ګډې پولې د ساتنې او امنیت وړتیا نه لري.

د پاکستان د کورنیو چارو وزیر ویلي، هېواد یې په خپله خاوره کې له ترهګرو سره د مقابلې توان لري، خو تر څو چې له افغانستانه د ترهګرو ګواښونه هوار نه شي، پاکستان به له امنیتي ګواښونو سره مخ وي.

هغه دا هم وویل چې افغانستان ته به وویل شي چې د پاکستان په وړاندې د دغه هیواد د تروریستي ګواښونو په وړاندې د مبارزې په برخه کې ناکامي د دواړو هیوادونو پر دوه اړخیزو اړیکو اغیزه کولی شي.

تر دې وړاندې د پاکستان د بهرنیو چارو وزیر له CNBC سره په خبرو کې د تحریک انصاف حکومت په دغه هېواد کې د ناامنیو او ترهګریزو بریدونو د زیاتوالي مسوول بللی و او له ترهګرو سره یې د خبرو اترو پیل کړی و.