تاند: (پنجشنبه، د دلوې ۲۷) د سټنډرډ ملي ادارې د هرات ولایت په اسلام قلعه بندر کې 22 ټانکره بې کیفیته تیل (ډیزل او پطرول) چې د دې ادارې له سټنډرډونو سره یې مطابقت نه درلود، بېرته ایران هېواد ته مسترد کړل.
د طالبانو په یوه اعلامیه کې راغلي، چې دغه تېل په هرات کې د سټنډرډ ملي ادارې د کیفیت له لابراټواري ټیسټ څخه وروسته ایران هېواد ته وګرځول شول.
په دې وروستیو کې سټنډرډ ملي ادارې د بې کیفیته تیلو د واردولو د مخنیوي لپاره د جدي هڅو خبر ورکړی.
دغه اداره له ټولو سوداګرو غواړي تر څو هېواد ته با کیفیته توکي وارد کړي.
د طالبانو چارواکو نه دي ويلي، چې سرغړونکي سوداګر څوک وو او دوی څه ډول چلند ورسره کړی.
د طالبانو يو شمېر منتقدان يو شمېر طالب چارواکي له داسې سوداګرو سره په همکارۍ او معاملو تورنوي.