تاند (سې شنبه، د دلوې ۲۵مه) د طالبانو د حکومت ویندوی د کابل ښار په کارته نو مېنه کې نښته تاییدوي او وايي چې په لړ کې یې د داعش یو شمېر جګړه مار وژل شوي دي.
ذبیح الله مجاهد پر خپله ټویټرپاڼه کښلي چې د دوی امنیتي ځواکونو د داعش پر یوه پناهځای عملیات کړي دي:
د سیمې څو اوسېدونکو تاند ته وویل چې له څو چاودنو وروسته پر له پسې ډزې اوري.
نن ماښام د کابل اتمې حوزې کارته نو سیمه کې د داعشي خوارجو په يو مهم پټنځای عمليات روان دي، تر اوسه يو شمير یې وژل شوي، څرنګه چې ساحه ګڼ ميشته ده عمليات سوکه او په احتياط پرمخ ځي، دا د خوارجو يو مهم ګروپ ده چې د کابل په وروستيو بريدونو کې يې لاس درلود او خارجي اتباع هم پکې شته.
— Zabihullah (..ذبـــــیح الله م ) (@Zabehulah_M33) February 13, 2023
طالب ځواکونو سیمه کلابنده کړې او ادعا کېږي چې طالبانو لږترلږه ۱۰ داعشیان وژلي او یو تن له څو ښځو سره په یوه کور کې ژوندي نیولي دي.
طالبانو د دې عملیاتو په ترڅ کې د خپلو ځواکونو د مرګ ژوبلو په اړه څه نه دي ویلي.