تاند:( دوشنبه، د دلوې پينځه ويشتمه) د طالبانو د حکومت يوه پلاوي له ازبکستان سره د حيرتان-مزارشريف د اورګاډي کرښې د ساتنې لپاره دوه کلن تړون لاسليک کړ.
دا په داسې حال کې ده چې ازبکستان د روانې میاشتې په پیل کې د لسو ورځو لپاره عملیات وځنډول.
د طالبانو چارواکو تایید کړه چې د اورګاډي پټلۍ د ساتنې نوی تړون ازبکستان ته د دوی د پلاوي د سفر پر مهال لاسلیک شو.
د تېر کال په وروستیو کې افغانستان له یوه قزاقستاني شرکت سره د دغې کرښې د ساتنې او مدیریت تړون لاسلیک کړ، خو دغه تړون د نا معلومو دلايلو له مخې لغوه او پر ځای یې له ازبکستان سره نوی تړون لاسلیک شوی.
د افغانستان د اوسپنې پټلۍ لپاره د طالبانو عمومي رییس بخت الرحمن شرافت وايي، قزاقانو پر خپلې هوکړې عمل نه و کړی.
د هغه په وينا، ازبکستان ورسره ياد شوی تړون په تخفيف او ښو شرايطو لاسليک کړی دی.
په همدې حال کې د ازبکستان یوه چارواکي ویلي چې دوی به له افغانستان سره د دې کرښې د غځولو په برخه کې له پاکستان سره مرسته وکړي.
جمشید بابا قل وویل:«له افغان پلاوي سره د خبرو په پایله کې موږ موافقه وکړه چې له افغان حکومت سره به له پاکستان سره د اورګاډي د کرښې د غځولو په برخه کې همکاري وکړو.»
د طالبانو له بيا واکمنيدو سره، د افغانستان او ازبکستان په اړيکو، په خاص ډول په اقتصادي برخه کې د پراختيا خبرونه ورکړل شوي.