تاند (پنجشنبه، د دلوې ۲۰ مه) د امریکا د خزانې وزارت د افغانستان بانک د کنګل کړیو شتمنیو درې نیم میلیارد ډالره د سویس په یوه بانک کې د افغانستان امانت صندوق ته ولېږلې.
د امریکا حکومت تېر میلادي کال پرېکړه کړې وه چې دا پیسې به سویس ته لیږي.
تر دې مخکې د افغانستان د مالیې پخواني وزیر انوارالحق احدي، چې په سویس کې د افغانستان د امانت صندوق د کمېټې غړی دی، ویلي و چې امریکا دې صندوق ته هیڅ پیسې نه دي لیږلي.
د افغانستان د بیارغونې لپاره د امریکا د سرمفتش دفتر یا سیګار د متحدو ایالتونو د خزانې وزارت له لوري سویس ته د درې نیم میلیارد ډالرو د لېږلو خبر ورکړ، ویې ویل، په افغانستان کې د بایډن د حکومت په لومړیتوبونو کې په دې هیواد کې د پراخ بنسټه حکومت د جوړولو او له تروریزم سره د مبارزې په برخه کې پر خپلو ژمنو د طالبانو درېدل شامل دي.
د سویس حکومت ویلي، په اوږدمهال کې د افغانستان د امانت صندوق هدف دا دی چې دا پیسې د افغانستان بانک ته ولیږل شي، خو هغه مهال به دا کار وشي چې د افغانستان بانک ثابته کړي چې خپلواک دی، د طالبانو تر اغېز لاندې نه دی او همداراز دا ډاډ ورکړي چې له پیسو مینځلو سره مبارزه کوي او د تروریستي ډلو تمویل ته اجازه نه ورکوي.