شنبه, مې 18, 2024
Homeخبرونهامریکا وايي، د چین جاسوسي بالون یې ویشتی دی

امریکا وايي، د چین جاسوسي بالون یې ویشتی دی

تاند (یکشنبه، د دلوې ۱۶ مه) امریکا د چین یو ستر بالون، چې وايي د جاسوسۍ لپاره وراستول شوی و، ویشتی دی.

د متحدو ایالتونو دفاع وزارت تایید کړه چې جنګي الوتکو یې د متحدو ایالتونو په اړوندو اوبو له پاسه چینايي بالون ویشتی دی.

د شنبې په ورځ دې بالون د ویشتلو د عملیاتو په ترڅ کې امریکا د شمالي کارولینا او جنوبي کارولینا هوايي ډګرونه بند کړل.

د امریکا دفاع وزارت د جمعې په ورځ د امریکا د مونتانا ایالت پر فضا د چین د جاسوسي بالون د کشف خبره کړې وه.

د امریکا د اتومي توغندو په درو مرکزونو کې یو په مونتانا کې دی. ویل کېږي چې دا بالون د شمالي کارولینا ایالت لور ته روان و.

دا مسله د امریکا د حکومت د سخت غبرګون او د چین سفارت ته د رسمي شکایت سبب شوه. همداراز دا موضوع په کانګریس کې د جمهوریپال ګوند د استازو اعتراض وپاراوه.

جمهوریپال د پیکینګ په وړاندې د غوڅ دریځ د غوره کېدو غوښتونکي دي.

د چین د باندنیو چارو وزارت یوه ویندوی د جمعې په ورځ په نسبتاً پخلایونکو الفاظو وویل چې دا بالون پوځي نه دی او د هواپېژندنې لپاره د څېړنو لپاره وه چې له خپلې اصلي لارې بې لارې شوی دی.

یوه امریکايي چارواکي د امریکا د خاورې له پاسه د دغه بالون د تېرېدو په اړه ویلي، پنتاګون باور لري چې دا د هواپېژندنې بالون نه دی او نه له خپلې لارې بې لارې شوی دی.

د فاکس نیوز تلویزیون د راپور له مخې، یوه جګپوړي امریکايي چارواکي ویلي چې دا بالون د چین له خاورې راالوتلی خو د تصادف له مخې د امریکا خوا ته نه دی راغلی.

په همدې حال کې یوه امریکايي چارواکي ویلي چې د چین د جاسوسي بالون له کبله پیکینګ ته د متحدو ایالتونو د باندنیو چارو وزیر سفر ځنډول شوی دی.

د امریکا دفاع وزارت د جمعې په ماښام د لاتینې امریکا په اسمان کې د یوه بل چینايي بالون د تېرېدو خبر ورکړ.

د پینتاګون ویندوی جنرال پاتریک رایډر په یوه بیان کې ویلي چې دوی د لاتینې امریکا په فضا کې د یوه بالون د تېرېدو راپور ترلاسه کړی او اوس په دې غور روان دی چې دا د چین یو بل جاسوسي بالون دی.

LEAVE A REPLY

Please enter your comment!
Please enter your name here

- Advertisment -

ادب