تاند(سې شنبه، د دلوې ۱۱ مه) د پېښور ښار د پولیس لاین سیمې په جومات کې د پرونۍ انتحاري حملې د وژل شویو کسانو شمېر تر ۹۰ واوښت.
د جومات تر کنډوالو لاندې تېره شپه یو شمېر مړي وموندل شول او دغه راز یو شمېر ټپیانو په روغتون کې سا ورکړې ده.
له پرون راهیسې پر له پسې د دې پېښې د قربانیانو شمېر په زیاتېدو دی او لا هم ویره ده چې د قربانیانو شمېر به تر دې واوړي.
د پېښور د پولیسو د مشر محمداعجاز حان په وینا، د برید په مهال په جومات کې له ۳۰۰ تر ۴۰۰ پولیس حاضر وو.
پاکستاني طالبانو یا ټي ټي پي په دې برید کې لاس لرل رد کړي دي. پرون د دې ډلې یوه قوماندان ادعا کړې وه چې دا برید د دوی یوه کس، چې سربکف مومند نومېږي کړی دی.
دا برید د پېښور په یوه خورا خوندي سیمه کې شوی او له همدې کبله د ډیرو لپاره پوښتنې پیدا شوي چې څرنګه انتحاری بریدګر وتوانېده ځان هلته ورسوي.
د برید په نتیجه کې ټول وژل شوی کسان پولیس او په تېره بیا تروریستي ضد ځانګړي پولیس دي.