تاند:( دوشنبه، د دلوې درېیمه) د لغوه شوې مشرانو جرګې منشۍ راحیله دوستم، چې د عبدالرشيد دوستم لور ده، په ترکیه کې د افغان ښځو د حقونو په ننګه او د طالبانو د حاکم رژیم خلاف لویه غونډه کړې ده.
نوموړې په دې غونډه کې له نړیوالو غوښتي، چې د طالبانو پر ضد فشارونه زيات او د افغانانو او په خاصه توګه د ښځو دفاع وکړي.
د جمهوري نظام له سقوط څخه شاوخوا يو نيم کال وروسته دا لومړی ځل دی، چې د دوستم لور د افغان ښځو په ننګه غږ پورته کوي.
څه موده مخکې د دوی د کوربه هېواد ولسمشر رجب طیب اردوغان هم د ښځو پر ضد د طالبانو د رژيم سياستونه نقد کړي او د اسلام او انسانيت خلاف بللي وو.
د چارو يو شمېر شنونکي باور لري، چې پخواني جنګسالاران د ښځو پر وړاندې د افغان مبارزو ښځو نړیوال شوی غږ اوس په خپله ګټه تماموي.