تاند:( شنبه، د دلوې اوله) د کابل لپاره د طالبانو د رژيم چارواکو له نیشه یي معتادینو څخه د پل سوخته سیمې د تصفيې خبر ورکړی.
د کابل لپاره د طالبانو د امنیې قومندانۍ ویاند خالد ځدراڼ ويلي، چې له دغې سیمې څخه ېې د ښځو او ماشومانو په ګډون ګڼ معتادین د روږدو کسانو د درملنې مرکزونو ته ليږدولي.
يو شمېر خلکو د طالبانو دا اقدام ستایلی، خو ورسره ېې د معتادینو پر وړاندې د طالبانو متشدد چلند نقد کړی او ویلي، چې بې رحمانه چلند ورسره کوي.
خلک په عین حال کې د نيشه يي توکيو د کاروباریانو په نیولو او مجازاتو ټینګار کوي، خو د طالبانو ځینې منتقدین خپله د دوی ځینې مشران د نيشه يي توکيو د مافیا په همکارۍ تورنوي، خو طالبان دا ادعا بې بنسټه بولي.
هر با احساسه افغان د معتادینو له ژوند اووضعیت نه متآثره کیږي .
اعتیاد یو مرض دی ، معتادین له یو بل نه په ساري امراضو اخته کیږي .
د افغانستان ځوانان د اعتیاد له امله له کار ، ژوند ، کورنۍ ، دوستانو او د هېواد له مسؤلیتونه منحرف او ګوښه کیږي . علاوه پردې چې دوی د کورنۍ او ټولنې تیار خواره او اضافي بار جوړیږي ، د خپلو پوډرو اخیستو لپاره غلا او نورو بدو اعمالو سرته رسولو ته اړکیږي.
کله چې دوی په لارو او کوڅو کې ناست او پوډر څکوي ، د لارویانو او هېوادوالو د مزاحمت ترڅنګ د نورو ځوانانو د تشویق او په اعتیاد اخته کېدو سبب کیږي .
بنا د حکومت او مسوولینو دنده ده چې هغوی راټول کړي ، تر تداوي لاندې یې ونیسي . تر ښه کېدو وروسته هغه کسان چې مخکې یې کور ، کار ، تحصیل او شغل درلوده ، بېرته هلته د جدي او قوي ضمانت ورکولو سره ولیږل شي .
پاتې نور کسان باید د وطن د آبادۍ او عمران لپاره استخدام شي . مثلا شاروالۍ ، ټولګټو وزارت ، معادن او صنایعو وزارتونو ته معرفي شي چې د کارګر په توګه دنده اجرا کړي .