تاند:( پنجشنبه، د جدي ۲۲) د طالبانو د حاکمې ادارې د بهرنيو چارو وزير مولوي امیرخان متقي په ايمرجنسي روغتون کې د کابل پېښې د ټپیانو پوښتنه وکړه.
نوموړي له ټپیانو سره د مالي مرستې تر څنګ له روغتيايي مسوولينو غوښتي، چې د ټپیانو ښه درملنه وکړي.
د بهرنيو چارو وزارت مخې ته د چارشنبې ورځې مازيګر د طالب چارواکو په وینا چاودنه او د ځینو نورو راپورونو له مخې ځانمرګی برید وشو، چې لسګونه تنو ته د مرګ ژوبلې خبرونه پکې ورکړل شوي.
طالب چارواکو په دې پېښه کې د ۵ تنو د وژل کیدو او يو شمېر نورو ټپي کیدل تایید کړي، خو ځينې رسنۍ یې د خپلو سرچينو په حواله د وژل شويو شمېر ۲۱ تنه او د ټپيانو ۲۵ تنه بولي.
د طالبانو د اطلاعاتو او فرهنګ وزارت نشراتي مرستيال مهاجر فراهي د فرانسې خبري اژانس ته تایید کړې، چې د پېښې پر وخت چینايي استازي د طالبانو د بهرنيو چارو وزارت چارواکو سره په خبرو بوخت وو.
د پېښې مسووليت چا پر غاړه نه دی اخیستی، خو د افغانستان مختلفو سیاسي څېرو غندلې او د طالبانو منتقدینو هېواد ته په امنيت راوستو کې د طالبانو د ناکامۍ نښه ګڼلې ده.