تاند (سې شنبه، د تلې/ میزان ۷ مه) د پاکستان د اطلاعاتو وزیر عطاالله تارړ له تحریک انصاف ګوند، پيټيای، څخه غوښتي چې روښانه کړي د پاکستان ملاتړ کوي که د افغانستان.
تارړ په اسلاماباد کې یوې خبري غونډې ته وویل چې خیبر پښتونخوا له سختو امنیتي ستونزو او د ترهګرۍ له زیاتېدونکو بریدونو سره مخامخ ده، خو په دغه ایالت کې د پيټيای په مشرۍ حکومت د ترهګرۍ پر وړاندې کافي اقدامات نه کوي.
هغه ادعا وکړه چې د خیبر پښتونخوا حکومت د ترهګرۍ ضد اقداماتو لپاره ورکړل شویو مالي سرچینو سمې کارونې ته هم کافي پاملرنه نه ده کړې او د افغانستان له لوري د ډزو وروستیو پېښو ته یې مناسب غبرګون نه دی ښودلی.
د پاکستان د کورنیو چارو د دولت وزیر طلال چوهدري هم په دې خبري غونډه کې د خیبر پښتونخوا د حکومت پر امنیتي تګلارې نیوکه وکړه او ویې ویل چې فدرالي حکومت د دغه ایالت پولیسو ته د مرمۍ ضد موټرو د ورکولو وړاندیز کړی و، خو ایالتي حکومت بېرته ستانه کړي دي.
دواړو پاکستاني چارواکو د خیبر پښتونخوا د پولیسو په قانون کې پر وړاندیز شویو بدلونونو هم اندېښنه څرګنده کړه او ویې ویل چې دا بدلونونه ښايي د پولیسو پر قوماندې او اداري جوړښت د ایالتي حکومت واک زیات کړي.