تاند:( سې شنبه، د جدي ديارلسمه) د ننګرهار په اچين او کوټ ولسواليو کې سويډن کمېټې په ۲۱.۴ ميليونه افغانيو مالي لګښت د نجونو د دوو ښونځيو ودانۍ جوړې او پرانیستل شوې.
د ننګرهار لپاره د طالبانو د والي مطبوعاتي دفتر وايي په اچين کې د ۱۰.۲۲ ميليونه افغانيو په مالي لګښت دغه ښوونځی په يو پوړ کې جوړ شو،چې اته درسي او څلور اداري خونې، اته تشنابونه او اتيا متره مربع د احاطې ديوال لري.
دغه راز د کوټ ولسوالۍ حيدرخېلو نجونو لومړني ښوونځي ودانۍ د ۱۰.۹۲ میليونه افغانيو په مالي لګښت په يو پوړ کې جوړه شوې، چې اته درسي او اداري خونې، لس تشنابونه او څلور سوه متره مربع د احاطې ديوال لري.
سرچینه زیاتوي:«ياد ښوونځيو ته به درې کسيزې چوکۍ او نور ملحقات هم ورکړل شي.»
دا په داسې حال کې ده، چې طالبانو د نجونو پر زده کړو بندیز لګولی او له دې کبله په ملي او نړيواله کچه سختو مخالفتونو سره مخ دي.