تاند:( دوشنبه، د جدي دولسمه) د ننګرهار ولايت مرکز جلال اباد ښار لومړۍ ناحيې کې د ښاروالۍ ادارې په ۲۱.۶ ميليونه افغانيو مالي لګښت د دوه کيلومتره په اوږدوالي د دوو فرعي سړکونو د جوړونې چارې پيل شوې.
د طالبانو ځايي چارواکو ويلي، چې دې سړکونو په اوږدو کې پلې لارې، ويالې او ګلدانونه هم جوړيږي، چې د شپږ مياشتو په موده کې به يې چارې بشپړې شي.
د جلال اباد لپاره د طالبانو ښاروال حاجي ملا نعمت الله اخند د ياد سړک د چارو پرانيستلو پر مهال له ښاريانو وغوښتل، چې د عوايدو په ټولولو کې همکاري وکړي، ترڅو د ښار په ټولو برخو کې متوازن انکشاف رامنځته شي.
له جلال اباد څخه په وروستيو کې د ورته پروژو خبرونه زیات شوي، چې خلکو ېې هرکلی کړی دی.