تاند:( دوشنبه، د جدي دولسمه) هرات کې د ایران د یوه وژل شوي ناندريز استخباراتي مشر قاسم سلیماني په درناوي، د هغه د وژل کیدو د کلیزې په مناسبت د عکسونو نندارتون جوړ شوی.
ایراني رسنیو ویلي، چې په دې نندارتون کې د ايران د کونسلګرۍ چارواکو هم ګډون کړی و.
سلیماني د ایران د سپاه پاسداران استخباراتي ځواک مشر و، چې څو کاله مخکې د امریکایي ځواکونو د برید پر مهال د عراق په پلازمېنه بغداد کې ووژل شو.
نوموړی په سيمه کې د ایران د استخباراتي پروژو د عملي کیدو مهم تطبيقونکی بلل کیده او ويل کېږي، چې طالبانو سره د ایران مخکینۍ ترينګلې اړيکې هم هغه ترمیم او د طالبانو د مالي او تسلیحاتي ملاتړ له لارې د دوی بیرته واکمنيدو سره مرسته وکړه.
په يادو مراسمو کې د طالب چارواکو د ګډون او نه ګډون په اړه څه نه دي ويل شوي.