تاند:( سې شنبه، د جدي شپږمه) د داعش ډلې خراسان څانګې په بدخشان کې د طالبانو د امنیې قومندان عبدالحق ابو عمر د وژل کیدو مسوولیت پر غاړه اخیستی.
د نوموړي د وژل کیدو خبر پرون ورکړل شو.
د طالبانو د کورنيو چارو وزارت ويلي، چې د هغه د وژلو په تور ېې ۴ تنه نیولي دي.
دا په داسې حال کې ده، چې د طالبانو خلاف د مقاومت جبهې په نوم يوې جنګيدونکې ډلې د نوموړي قوماندان وژل کیدل د طالبانو د خپلمنځیو اختلافونو له امله بللي.
د طالبانو له واکمنيدو وروسته، دا لومړی ځل دی چې د موټر بم چاودنې له امله داعش ډلې د يوه ولايت په کچه د طالبانو د يوه مهم قوماندان د وژلو خبر ورکړی.
بدخشان د افغانستان په شمال کې له هغو ولايتونو څخه دی، چې د ډېرو افراطي مدرسو د موجودیت خبر پکی ورکړل شوی او ویل کېږي، چې حزب التحرير ډلې پکی په فکري لحاظ داعش ډلې ته ډېره زمينه سازي کړې ده.