تاند:(شنبه، د قوس پینځمه) د بریتانیا دې ټيلګراف ورځپاڼې په قطر کې د فوټبال نړیوال جام سیالیو په اړه یوه راپور کې ادعا کړې، چې طالب مشرانو د لوبغالو یا سټوډیومونو په جوړولو کې له اخيستو پروژو میلیونونه ډالر ګټلي دي.
ورځپاڼې د طالبانو د قطر دفتر د سرچينو له قوله لیکلي:« له ۲۰۱۳ م کاله، لوړپوړو طالب چارواکو د سولې له بهیر سره په تړاو لوړې تنخواوې اخیستې او په همدغو پیسو یې د ودانۍ جوړولو درانه ماشین آلات رانیول او بیایې هغو شرکتونو ته په کرایه ورکول چې دغه لوبغالي يې جوړول.»
ورځپاڼې د خپلو سرچينو په حواله ویلي:« د فوټبال دغه ټورنمنټ، طالبانو لپاره د سرو زرو مرغۍ وه.»
په راپور کې ادعا شوې، چې طالب مشرانو د يادو پانګونو پيسې له هغو لوړو معاشونو څخه پیدا کړي، چې امريکا او ملګرو ملتونو د سولې خبرو پر مهال دوی ته ورکولې.
د طالبانو یوه ویاند دغه ادعاوې ردکړي دي.
ورځپاڼه زياتوي،چې د يادې قضيې معلومات په افغانستان کې د طالبانو له سخت دریځۍ څخه تنګ شویو دوو طالب چارواکو ورسره شریک کړي دي.
ورځپاڼه لیکي:« د دوی ملاحظه دا وه چې دغه مشرانو قطر کې لوکس او مجلل ژوند درلود خو افغانستان کې توندلارې تګلارې پلي کوي.»
مخکې په یوه راپور کې راغلي وو، چې د طالبانو د ډېرو مشرانو لوڼې په قطر او نورو هېوادونو کې عصري زده کړې کوي او ان د فوټبال لوبډلو غړیتوب لري، خو په افغانستان کې ېې د میلیونونو نجونو پر وړاندې له شپږم ټولګي څخه پورته د نجونو ښوونځي تړلي دي.