تاند:(جمعه، د قوس څلورمه)د طالبانو د رياست الوزرا سياسي مرستيال مولوي عبدالکبیر د افغانستان صرافانو سراسري ټولنې رئيس او غړو سره وکتل.
د نوموړي د دفتر په یوه اعلامیه کې راغلي،چې د دغې لیدنې پر مهال د صرافانو سراسري ټولنې رئيس ميرزا محمد کټوازي او د دې ټولنې غړو عبدالرحمن ځيرک او خان محمد باز د شهزاده سرای او صرافانو ټولنې يو شمېر ستونزې او وړانديزونه شريک کړل.
دوی وويل، په داسې حال کې چې د افغانستان بانکي سيستم پاشل شوی، نو اوس د افغانستان ټوله اقتصادي تکيه پر صرافانو ده او په دې برخه کې يې له مولوي کبير څخه د همکاريو غوښتنه وکړه.
دوی وويل، صرافان د ملت او حکومت ترمنځ د پول حيثيت لري. د افغانستان د صادراتو او وارداتو ټول معاملات زموږ له لارې ترسره کېږي او د دې باور ساتلو لپاره باید حاکمه اداره پر وخت د صرافانو مشروع غوښتنو ته مثبت ځواب ووايي.
د طالبانو د اعلاميې له مخې، مولوي عبدالکبير د صرافانو ټولنې رئيس او غړو ته د هر راز همکاريو ډاډ ورکړ وې ويل، ستاسو وړانديزونه او غوښتنې به د لازمو تصمیمونو لپاره له اړوندو ادارو سره شريک شي.
طالبانو په یاده لیدنه کې د صرافانو د مطرح شویو ستونزو او غوښتنو جزييات نه دي څرګند کړي.
د طالبانو له بیا واکمنيدو سره، پر صرافانو د کاروبار لپاره سخت قیودات وضع شول، چې له امله ېې صرافانو څو ځلې کار بندیز هم اعلان کړ.