تاند:(چار شنبه، د قوس دويمه) د افغانستان لپاره د جرمني هېواد سفارت اعلان وکړ ،چې هېواد ېې له افغانستان سره ۹۰ ميليونه يورو نوې بشري مرسته کړې ده.
د ياد شوي سفارت په ټویټر پاڼه کې راغلي، چې ياده مرسته په افغانستان کې خطرناک بشري وضعيت ته په کتو سره شوې.
سرچينه زياتوي، چې دغه مرسته به د خوړو نړیوال سازمان او ملګرو ملتونو د اړوندو ادارو له لوري ولګول شي.
د جرمني د سفارت په اعلامیه کې راغلي، چې دې مرستې سره ېې سږکال په افغانستان کې د ټولو مرستو سطحه ۳۳۱ میلیونه یورو ته ورسیده.
ويل شوي، چې له بشري مرستو وراخوا جرمني افغانستان سره په ۲۰۲۲ کې ۱۸۷ ميليونه يورو د روغتيايي خدمتونو، زده کړو او غدايي امنيت لپاره مصرف کړي دي.
جرمني په ورته وخت کې ټينګار کړی، چې د افغانستان خلکو سره به ېې ملاتړ دوام وکړي.
دغه هېواد د افغانانو د بشري حقونو او په خاص ډول د ښځو د حقونو د نقض په اړه انديښنه ښودلې او دغه نقض ېې غندلی.
د جرمني سفارت ویلي ، چې ټول افغانان باید له وېرې پرته د مدني حرکتونو، بیان ازادۍ او سوله ییزو ټولیدنو حق ولري.