تاند:(چار شنبه، د قوس دويمه) د امریکا د بهرنیو چارو وزیر انتوني بلینکن په قطر کې د افغان پناه غوښتونکو له یوه کمپ څخه د لیدنې پر مهال ويلي، چې امريکا ته یې د افغان خطر ځپلو متحدينو د لېږد بهیر به دوام ولري.
د هغه په وينا، مختلفې ادارې د خطر ځپلو کسانو او امریکا سره ېې د تړاو په اړه خپلې ارزونې او د اداري پړاوونو مخته وړلو ته دوام ورکوي.
امریکايي وزير په دې برخه کې د کارکوونکو د شمير زیاتیدو خبر هم ورکړی او ویلي، چې په چارو کې له چټکتيا سره اوس د ۸۸۳ ورځو اداري پړاوونه په ۱۰۵ کې تر سره کیږي.
امريکايي وزیر د افغان پناه غوښتونکو د لېږد بهیر د چټکتیا نور جزییات نه دي په ډاګه کړي.
امريکا د جمهوري نظام له سقوط وروسته لسګونه زره افغانان په امريکا کې د پناه ورکولو له ژمنې سره څه خپلې خاورې ته لېږدولي او يوه لويه برخه نور يې په درېيمو هېوادونو کې د قضيو د اداري پړاوونو د مخته وړلو لپاره بللي، چې ډېری دغه کسان له ناوړه وضعيت او اقتصادي ستونزو شکایت لري.