پاکستاني استخباراتو او سیمه ییزو هېوادونو د احمد مسعود او ط-انو د پخلاينې هڅې پيل کړي

تاند:( سې شنبه، د قوس لومړۍ) ‏راپورونه ښيي، چې د پاکستان د استخباراتي ادارې د مشر په ګډون د سيمې ډېرو هېوادونو د طالبانو د ادارې او د دوی خلاف د يوې جنګي ډلې د مشر احمد مسعود تر منځ د پخلاينې هڅې پيل کړي دي.

بېلابېلو باوري سرچينو تاند ته منلې، چې په دې لړ کې د احمد مسعود او د پاکستاني استخباراتو د مشر او د افغانستان لپاره د قطر د ځانګړي استازي تر منځ په دوبۍ کې ليدنې شوي.

سرچېنې زياتوي، چې روسیې ته د احمد مسعود سفر هم د روسیې په غوښتنه د همدې لپاره شوی، چې د پنجشېر مقاومت ډلې او طالبانو ترمنځ د سولې خبرو ته زمینه برابره شي.

يوې سرچينې تاند ته وويل، چې د احمد مسعود د پلار او د پنجشېر د مشهور قوماندان احمد شاه مسعود قبر ته د طالبانو د پنجشېر د والي ورتګ او دغې مقبرې ته د ساتونکو د ګمارلو اعلان هم له يادو هڅو سره تړاو لري.

د نړیوالو چارو څارونکي باور لري، چې د سیمې هېوادونه او د طالبانو نور ملاتړي د طالبانو خلاف د لويديز لخوا د رامنځته کيدونکو بديلو ادرسونو له احتمال څخه دا غوره بولي، چې طالبان او د دوی نور پخواني سخت دریځه متحدین سره پخلا او خپلې ګټې پرې تامین وساتي.

طالبانو او د احمد مسعود ډلې دواړو د تازه راپورونو په اړه څه نه دي ويلي.

د طالبانو او احمد مسعود تر منځ مخکې په ايران کې يوه غونډه بې پایلې پای ته رسیدلې وه.

احمد مسعود ویلي وو، چې د طالبانو د بهرنيو چارو وزير مولوي امیرخان متقي د يادې غونډې پر مهال د طالبانو امیرالمؤمنین سره د بیعت غوښتنه ترې کړې وه او په بدل کې ېې ده ته د يوه وزارت د ورکولو چمتووالی ښودلی و.