تاند:(دوشنبه ،د عقرب شپاړسمه) د طالبانو بهرنیو چارو وزارت د مصر په شرم الشيخ ښار کې د اقليمي بدلون د ۲۷مې سرمشريزې دایرېدو ته غبرګون ښودلی.
دغه وزارت ويلي،چې یاده غونډه نړۍ ته د ور پېښو اقليمي ننګونو له پاره د حل لارو را اېستلو پر لور لومړنی ګام بولي او باور لري چې ګډې ننګونې له تفاهم او ګډ کار پرته نه شي هوارېدی.
د طالبانو په اعلامیه کې راغلي:«د افغانستان په څېر هغه هيوادونه بايد له پامه و نه غورځول شي چې د اقليم په بدلون کې يې هېڅ منفي ونډه نه ده لرلې، مګر له ناوړو اغېزو سره يې لاس او ګرېوان دي.»
طالبان زیاتوي، چېيوازې سږ کال افغانستان ته د اقليمي بدلون د منفي اغيزو له کبله له دوه ميليارده ډالرو زيات زيان اوښتی.
د طالبانو ادارې ټینګار کړی،چې د دغه زيان جبيره، د نورو احتمالي زيانونو کمول او له ګواښ سره مخ ټولنو مقاومت لوړول په هيواد کې د اقتصادي ثبات تر راتګ پورې د نړيوالې ټولنې داسې پرمختيايي مرستې ته اړتيا لري چې د افغانستان د ملي لومړيتوبونو په رڼا کې تر سره شي.
د اقلیم په اړه د ملګرو ملتونو په یاده غونډه کې افغانستان د نړۍ د اقلیمي بدلونونو شپږم ډېر ځپل شوی هېواد ګڼل شوی.
په افغانستان کې له څه باندې یو کال راهیسې بېلابېلې طبيعي پېښې لکه سیلاوونه، ورښتونه او زلزلې د سلګونه تنو د مرګ ژوبلې او درنو مالي زيانونو سبب شوي دي.