تاند(جمعه، د عقرب ۶ مه) د اریانا افغان هوايي شرکت چارواکي وايي چې له اوو کلونو وروسته یې د متحده عربي اماراتو العین ښار ته بیا الوتنې پیل کړي دي.
د اریانا افغان هوايي شرکت د ټکټونو د پلور د څانګې مشر احمدسیر سکندري رسنیو ته وویل، د دې شرکت الوتکو له اوو کلونو وروسته بیا العین ته الوتنې پیل کړي او په اوونۍ کې به دوې الوتنې لري.
د سکندري په وینا، دا دوې الوتنې به د شنبو او چهارشنبو په ورځو وي.
افغان سوداګرو او امارات مېشتو افغان مسافرو د اریانا افغان هوايي شرکت د دې اقدام ستاینه کړې او هیله یې څرګنده کړې چې له دې سره به د دوو هیوادونو ترمنځ تجارتي راکړه ورکړه هم ډیره شي.
خو دوی په عین حال کې هیله وکړه چې د متحده عربي اماراتو د العین، دوبۍ او ابوظبۍ او د کابل، کندهار او خوست د هوايي ډګرونو ترمنځ دې د تجارتي مالونو د وړلو – راوړلو لپاره هم الوتنې ځانګړې شي.
په همدې حال کې د خوست اوسیدونکي، چې له ډیرو کلونو راهیسې د خوست او متحده عربي اماراتو ترمنځ د الوتنو د پیلېدو غوښتنه لري، وايي چې العین ته د اریانا افغان هوايي شرکت الوتنې دې خوست ته هم پراخې شي.
له بلې خوا فلای دوبۍ ویلي چې په راتلونکو څو ورځو کې کابل ته الوتنې بیا پیلوي.
دغه شرکت د روان اکتوبر په لومړیو کې ویلي و چې د نوومبر په لومړیو کې به کابل ته الوتنې پیل کړي.