تاند:(دوشنبه ،د عقرب دويمه) د بدخشان لپاره د طالبانو د ادارې ولايتي وياند په دې ولايت کې د طالبانو د دوو ياغي شویو قومندانانو په ګډون د ۳۸ تنو د وژلو خبر ورکړ.
طالب وياند معزالدين احمدي باختر اژانس ته وويل، چې دغه کسان د تېرې اونۍ د عملياتو پر مهال یې وژل شوي.
نوموړي د دغو عملياتو دقیقې سیمې نه دي ښودلي، خو ویلي چې وژل شوي ياغي قومندانان يې بحرالدین او عبدالحمید نومیږي.
طالبانو په دغو عملياتو کې د ۷۸ تنو د نيولو خبر هم ورکړی، خو نه ېې دي ويلي چې دوی هم مخکيني طالب وسله وال که نور خلک دي.
د طالبانو د ولایتي ویاند د معلوماتو له مخې، د يادو عملياتو پر مهال د دوی ۳ ځواکونه هم وژل شوي او ۵ نور ټپيان دي.
نوموړي ادعا کړې، چې عمليات ېې له دوی څخه د تازه ياغي شویو طالبانو د ريښو له ختمولو سره پای ته رسولي دي.
له څه مودې راهيسې د طالبانو د دغو ځايي قوماندانانو په اړه ويل کیدل، چې د طالبانو خلاف د پنجشېر د مقاومت ډلې سره یوځای شوي دي.
يادې ډلې څو ورځې وړاندې د طالبانو له لیکې د دوی دغو قوماندانانو او جنګیالیو د بېلیدو او دوی سره د يو ځای کیدو خبر ورکړی و.
طالبانو مخکې په سرپل کې د خپل یوه یاغي شوي مطرح هزاره قومندان مولوي مهدي مجاهد خلاف هم عمليات وکړل، چې هغه ترې وژغورل شو او وروسته ېې ايران ته د تګ پر وخت په نېمروز کې د وژل کیدو اعلان وشو.
مهدي يې په نیمروز کي نه ، بلکې په هرات کي ونیوه او هلته يې وواژه (نوموړی د هرات په کهسان ولسوالۍ کي چي له ایران سره پر ګډه پوله پروته ده).