تاند:(يکشنبه ،د عقرب لومړۍ) د طالبانو په یوه اعلامیه کې راغلي،چې اميرالمومنين ملا هبت الله اخندزاده د دوی د دفاع وزارت له استخباراتي مسوولينو سره لیدلي او زندانیانو سره ېې د « شرعي چلند» په تر سره کیدو او د « ناروا شکنجو » په مخنيوي ټينګار کړی.
د اعلاميې له مخې، نوموړي دغه راز د کشف او تعقيب پر مهال د بې ګناه کسانو د نه نیولو امر کړی.
د طالبانو امیرالمؤمنین دغه راز خپلو استخباراتي منسوبینو ته د خپلو لیکو د تصفيې او پکې د ښو خلکو د ګومارنې ټینګار کړی او ویلي:((خپل صفونه تصفیه کړئ، نا اهله او نا مطلوبه کسان پر دندو مه ګمارئ، د انډیوالۍ، قرابت، منطقه پرستۍ او قوم پرستۍ څخه ځانونه وساتئ، په خپلو منځو کې همغږي او د خپلو افرادو جدي مراقبت کوئ، له ناروا او غیر شرعي کړنو څخه یې منعه کوئ.))
د طالبانو وياندويانو له خپلو استخباراتي منسوبینو سره د ملا هبت الله د لیدنې او دغو سپارښتنو خبر په داسې مهال ورکړی، چې نن د افغانستان لپاره د ملګرو ملتونو د بشري حقونو ځانګړي راپور جوړونکي ريچارډ بنټ پنجشېر ته له سفر وروسته ځايي خلکو سره د طالبانو د ناسم چلند او شکنجو خبر ورکړی.
د طالبانو د بهرنيو چارو وزارت سياسي مرستيال عباس ستانکزي پرون له نوموړي سره د لیدنې پر مهال په دې اړه ادعاوې رد کړي او ويلي، چې د طالبانو له بيا واکمنيدو سره په زندانونو کې شکنجې صفر درجې ته رسیدلي.