تاند:(يکشنبه ،د عقرب لومړۍ) د طالبانو د کورنیو چارو وزیر سراج الدین حقاني د افغانستان لپاره د جاپان سفیر اوکدا تاکشي سره ولیدل.
د کورنیو چارو وزارت د خبرپاڼې له مخې، په دې لېدنه کې حقاني په کابل کې د جاپان سفارت د فعالېدو هرکلی وکړ او دا یې د دواړو هېوادونو ترمنځ د اړېکو د پیاوړتیا په برخه کې اغېزمن ګام یاد کړ.
د جاپان سفیر اوکدا تاکشي هم ژمنه وکړه، چې جاپان به د افغانانو ملاتړ او همکارۍ ته دوام ورکوي.
د طالبانو د خبرپاڼې له مخې، سراج الدين حقاني د یاد سفارت د استازو او فعالیتونو اړوند د پوره امنیتي خوندېتوب ډاډ ورکړ.
د جاپان د بهرنيو چارو وزير پرون وویل، چې په افغانستان کې ېې خپل سفارت په محدود ډول بیرته پرانيستی.
د طالبانو له بيا واکمنيدو سره، ډېرو هېوادونو په کابل کې خپل سفارتونه تړلي او يو محدود شمېر سفارتونه د بشري مرستو د ترسره کولو لپاره فعال دي.
د طالبانو حاکمې ادارې، چې هیڅ هېواد ېې په رسميت نه پيژني، له ټولو هېوادونو د خپلو سفارتونو د بیرته پرانیستلو غوښتنه کړې، خو ډېرو لږو ېې دغه غوښتنه منلې ده.
څه موده مخکې په کابل کې د روسیې د سفارت پر ودانۍ د داعش ډلې له لوري ځانمرګی برید وشو، چې د خپلو سفارتونو پرانيستو ته ډېر لېواله هېوادونه ېې هم بیرته دوه زړي کړل.